Leviticus 25

Exodus  «  Leviticus 24  ‹  Leviticus 25  ›  Leviticus 26  »  Numbers

ԵՕԹՆԵՐՈՐԴ ՏԱՐԻՆ (Բ. Օր. 15. 1-11)

Տէրը Սինա լերան վրայ խօսեցաւ Մովսէսի՝ ըսելով.

«Խօսէ՛ Իսրայէլի որդիներուն ու ըսէ՛ անոնց. “Երբ մտնէք այն երկիրը՝ որ ես ձեզի պիտի տամ, այդ երկիրը հանգիստի Շաբաթ մը թող պահէ՝ Տէրոջ նուիրուած։

Վե՛ց տարի քու արտդ սերմանէ, վե՛ց տարի քու այգիդ յօտէ եւ անոնց բերքը ժողվէ։

Բայց եօթներորդ տարին՝ երկրին համար հանգիստի Շաբաթ, այսինքն՝ Տէրոջ համար Շաբաթ թող ըլլայ. արտդ մի՛ սերմաներ ու այգիդ մի՛ յօտեր։

¹Արտիդ մէջ ինքնիրմէ բուսածը մի՛ հնձեր, եւ ²չյօտուած այգիիդ խաղողները մի՛ կթեր. ան հանգիստի տարի թող ըլլայ երկրին։

Երկրին Շաբաթը ձեզ պիտի կերակրէ, քեզ, ծառադ, աղախինդ, վարձկանդ ու քովդ պանդխտացած հիւրդ.

իսկ անասուններուդ եւ երկրիդ մէջ եղող կենդանիներուն կերակուր պիտի ըլլայ անոր ամբողջ բերքը”»։

ՆՈՐՈԳՈՒՄԻ ՏԱՐԻՆ

«Տարիներու եօ՛թը Շաբաթ հաշուէ, այսինքն եօթը անգամ եօթը տարի, որ տարիներուն եօթը Շաբաթներուն ժամանակը քեզի քառասունինը տարի ըլլայ։

Եօթներորդ ամսուան տասներորդ օրը՝ մեծագո՛չ հնչեցուր շեփորը. Քաւութեան օրը՝ ձեր ամբողջ երկրին մէջ հնչեցուցէ՛ք շեփորը։

Եւ յիսուներորդ տարին սրբացուցէ՛ք ու երկրի վրայ ազատագրութի՛ւն յայտարարեցէք անոր բոլոր բնակիչներուն համար։ Ասիկա ձեզի Յոբելեան պիտի ըլլայ. ձեզմէ իւրաքանչիւրը իր կալուածին պիտի վերադառնայ, եւ ձեզմէ իւրաքանչիւրը իր գերդաստանին պիտի վերադառնայ։

Այս յիսուներորդ տարին Յոբելեան թող ըլլայ ձեզի. ո՛չ սերմանեցէք, ո՛չ ալ ինքնիրմէ բուսածը հնձեցէք, եւ ձեր չյօտուած այգիէն մի՛ կթէք,

որովհետեւ Յոբելեան է։ Ան սուրբ պիտի ըլլայ ձեզի. արտէն պիտի ուտէք անոր բերքը։

Այս Յոբելեանի տարին՝ ձեզմէ իւրաքանչիւրը իր կալուածին պիտի վերադառնայ։

Եթէ դրացիիդ բան մը ծախես, կամ դրացիիդ ձեռքէն բան մը գնես, զիրար մի՛ կեղեքէք։

Յոբելեանէն ետք եղած տարիներուն թիւո՛վ գնէ քու դրացիէդ, ան ալ բերքի տարիներուն թիւո՛վ թող ծախէ քեզի։

Տարիներուն շատութեա՛ն համեմատ աւելցուր անոր գինը, եւ տարիներուն նուազութեա՛ն համեմատ պակսեցուր անոր գինը. որովհետեւ ան բերքի տարիներուն թիւով կը ծախէ քեզի։

Ուստի զիրար մի՛ կեղեքէք, այլ Աստուծմէ՛ վախցէք. քանի որ ե՛ս եմ Տէրը՝ ձեր Աստուածը»։

ԵՕԹՆԵՐՈՐԴ ՏԱՐՈՒԱՆ ՀԱՐՑԸ

«Իմ կանոններս գործադրեցէ՛ք, եւ իմ ³դատավճիռներս պահեցէ՛ք ու զանոնք գործադրեցէ՛ք, որպէսզի այդ երկրին մէջ ապահովութեամբ բնակիք.

երկիրը իր պտուղը պիտի տայ եւ պիտի ուտէք մինչեւ որ կշտանաք, ու անոր մէջ ապահովութեամբ պիտի բնակիք։

Եթէ ըսէք. “Եօթներորդ տարին ի՞նչ պիտի ուտենք, քանի պիտի չսերմանենք ու մեր բերքը չժողվենք”,

վեցերորդ տարին ձեր վրայ պիտի ⁴ղրկեմ իմ օրհնութիւնս, ու երեք տարուան բերք պիտի տայ.

ութերորդ տարին պիտի սերմանէք, եւ հին բերքէն պիտի ուտէք մինչեւ իններորդ տարին. մինչեւ անոր բերքին հասնիլը՝ հինէն պիտի ուտէք»։

ԿԱԼՈՒԱԾՆԵՐՈՒ ՆՈՐՈԳՈՒՄԸ

«Հողերը մշտնջենապէս պիտի չծախուին, որովհետեւ երկիրը իմս է, ու դուք իմ քովս պանդուխտներ եւ հիւրեր էք։

Ձեր կալուածը եղող ամբողջ երկրին մէջ՝ փրկելու առիթ պիտի տաք հողերուն համար։

Եթէ քու եղբայրդ աղքատանայ եւ իր կալուածին մէկ մասը ծախէ, զայն փրկելու իրաւունք ունեցողը, այսինքն՝ անոր ամենամօտ մերձաւորը, թող գայ եւ իր եղբօր ծախածը փրկէ։

Եթէ մարդը ո՛չ մէկը ունենայ՝ զայն փրկելու, բայց ⁵ինք անձամբ՝՝ կարողանայ անոր փրկագինը տալ,

անոր ծախուելէն ի վեր անցած տարիները թող հաշուէ եւ աւելցածը վերադարձնէ այն մարդուն՝ որուն ծախած էր զայն, որ իր կալուածին վերադառնայ։

Իսկ եթէ անոր վերադարձնելու կարող չէ, ծախուած բանը զայն գնողին ձեռքը թող մնայ մինչեւ Յոբելեանի տարին. Յոբելեանին՝ ան ⁶պիտի փրկուի՝՝, ու ծախողը իր կալուածին պիտի վերադառնայ։

Եթէ մէկը պարսպապատ քաղաքի մը մէջ բնակութեան տուն մը ծախէ, անոր ծախուելէն մինչեւ լման տարի մը ետք կրնայ փրկագին տալ անոր. ամբողջ տարուան մը մէջ կրնայ փրկագին տալ անոր։

Եթէ լման տարուան մը ընթացքին չփրկուի, պարսպապատ քաղաքին մէջ եղող տունը մշտնջենապէս գնողին պիտի ⁷մնայ՝ իր սերունդներուն մէջ։ Յոբելեանին այդ տունը ⁸պիտի չփրկուի՝՝։

Բայց իրենց շուրջը պարիսպ չունեցող աւաններուն տուները՝ երկրին արտերուն պէս պիտի սեպուին. անոնք կրնան փրկուիլ, եւ Յոբելեանին ⁹պիտի փրկուին՝՝։

Սակայն Ղեւտացիներու քաղաքներուն մէջ — իրենց կալուածը եղող քաղաքներուն մէջ — Ղեւտացիները միշտ կրնան իրենց տուներուն փրկագին տալ։

Եթէ մէկը Ղեւտացիներէն ¹⁰գնէ, ¹¹իր կալուածը եղող քաղաքին մէջ ծախուած տունը՝՝ Յոբելեանին ¹²պիտի փրկուի՝՝. որովհետեւ Իսրայէլի որդիներուն մէջ՝ Ղեւտացիներու քաղաքներուն տուները իրենց կալուածն են։

Բայց իրենց քաղաքներու արուարձաններուն արտերը պիտի չծախուին, քանի որ անոնք իրենց յաւիտենական կալուածն են»։

ԱՂՔԱՏՆԵՐՈՒ ՓՈԽԱՏՈՒՈՒԹԻՒՆԸ

«Եթէ քու եղբայրդ աղքատանայ ու իր ձեռքը քովդ դողայ, օգնէ՛ անոր գաղթականի եւ հիւրի պէս, որպէսզի քովդ ողջ մնայ։

Անկէ վաշխ ու տոկոս մի՛ առներ, հապա քու Աստուծմէ՛դ վախցիր, որպէսզի եղբայրդ քովդ ողջ մնայ։

Դրամդ վաշխով մի՛ տար անոր, եւ պարէնդ տոկոսով մի՛ տար։

Ե՛ս եմ Տէրը՝ ձեր Աստուածը, որ ձեզ Եգիպտոսի երկրէն հանեցի՝ Քանանի երկիրը ձեզի տալու համար ու ձեզի Աստուած ըլլալու համար»։

ԳԵՐԻՆԵՐՈՒ ԱԶԱՏԱԳՐՈՒՄԸ

«Եթէ քու եղբայրդ քովդ աղքատանայ եւ ինքզինք քեզի ծախէ, զայն ստրուկի մը պէս մի՛ ծառայեցներ.

ան քովդ վարձկանի կամ հիւրի պէս թող ըլլայ, ու ծառայէ քեզի մինչեւ Յոբելեանի տարին։

Այն ատեն քովէդ դուրս պիտի ելլէ, ինք եւ իր որդիները իրեն հետ, ու իր գերդաստանին վերադառնայ. իր հայրերուն կալուածը պիտի վերադառնայ։

Արդարեւ անոնք ի՛մ ծառաներս են, որ Եգիպտոսի երկրէն հանեցի. անոնք ստրուկի պէս պիտի չծախուին։

Բրտութեամբ մի՛ տիրապետեր անոր վրայ, հապա քու Աստուծմէ՛դ վախցիր։

Քու ստրուկդ եւ աղախինդ՝ որ պիտի ունենաս՝ ձեր շրջակայ ազգերէն ըլլան. անոնցմէ՛ ստրուկ եւ աղախին գնեցէք։

Նաեւ գնեցէ՛ք ձեր քով պանդխտացող հիւրերուն որդիներէն — անոնցմէ, կամ ձեր քով եղող անոնց գերդաստաններուն որդիներէն՝ որ անոնք ձեր երկրին մէջ պիտի ծնանին —, որպէսզի ձեր սեփականութիւնը ըլլան։

Ձեզմէ ետք ձեր որդիներուն ժառանգութի՛ւն թողուցէք զանոնք՝ որ տիրանան անոնց իբր սեփականութիւն, որպէսզի յաւիտեան ձեր ստրուկները ըլլան. բայց ինչ կը վերաբերի ձեր եղբայրներուն՝ Իսրայէլի որդիներուն, իրարու վրայ բրտութեամբ մի՛ տիրապետէք։

Եթէ քովդ եղող գաղթականը կամ հիւրը հարստանայ, իսկ անոր քով բնակող քու եղբայրդ աղքատանայ եւ ինքզինք ծախէ քովդ հիւր եղած գաղթականին, կամ այդ գաղթականին գերդաստանէն սերողի մը,

ինքզինք ծախելէն ետք ան կրնայ փրկուիլ։ Իր եղբայրներէն մէկը կրնայ փրկել զայն.

իր հօրեղբայրը կամ հօրեղբօրորդին կրնայ փրկել զայն, կամ իր գերդաստանէն ¹³ամենամօտ արենակից մը կրնայ փրկել զայն. կամ եթէ իր կարողութիւնը կը հասնի, ինքզինք կրնայ փրկել։

Զինք գնողին հետ թող հաշուէ՝ ինքզինք անոր ծախած տարիէն մինչեւ Յոբելեանի տարին, եւ իր ¹⁴փրկուելուն դրամը տարիներուն թիւով թող ըլլայ. անոր քով վարձկանի ժամանակին համեմատ թող ըլլայ։

Եթէ տակաւին շատ տարիներ կան, անոնց թիւին համեմատ թող վերադարձնէ իր փրկագինը՝ իր ծախուելու դրամէն.

իսկ եթէ Յոբելեանի տարիին քիչ տարի մնացած է, անոր հետ թող հաշուէ ու իր տարիներուն թիւին համեմատ թող վերադարձնէ իր փրկագինը։

Ինք անոր քով տարեկան վարձկանի պէս թող ըլլայ. գնողն ալ բրտութեամբ թող չտիրապետէ անոր վրայ՝ քու ¹⁵առջեւդ։

Եթէ այս կերպերով չփրկուի, Յոբելեանի տարին դուրս պիտի ելլէ, ինք եւ իր որդիները իրեն հետ։

Արդարեւ Իսրայէլի որդիները իմ ծառաներս են. անոնք Եգիպտոսի երկրէն իմ հանած ծառաներս են. ես՛ եմ Տէրը՝ ձեր Աստուածը»։